ရခိုင်ပြည်နယ်တွင်ဖြစ်ပွားခဲ့သော၂၀၁၂ ပဋိပက္ခနောက်ဆက်တွဲ ဒုက္ခသည်စခန်းများ ပိတ်သိမ်းမည်

RiA စစ်တွေ၊ ဇန်နဝါရီ ၃ ရက်

၂၀၁၂ ခုနှစ်တွင် ဖြစ်ပေါ်ခဲ့သော ပဋိပက္ခများကြောင့် တည်ရှိလာခဲ့ရသည့် ဒုက္ခသည်စခန်းများကို ပိတ်သိမ်းတော့မည် ဖြစ်သည်။

ပြည်ထောင်စုဝန်ကြီး ဒေါက်တာ ဝင်းမြတ်အေး အပါအဝင် ပြည်နယ်ဝန်ကြီးချူပ်နှင့် ပြည်နယ်အဆင့် ဌာနဆိုင်ရာ တာဝန်ရှိသူများသည် ဇန်နဝါရီ ၁ ရက်နေ့တွင် စစ်တွေမြို့ရှိ ဒုက္ခသည်စခန်းမှ တာဝန်ရှိသူများနှင့် အလုပ်ရုံ ဆွေးနွေးပွဲတစ်ခုကို ပြုလုပ်ခဲ့ကြပြီး စခန်းများပိတ်သိမ်းရေးကိစ္စကို သဘောတူခဲ့ကြသည်ဟု ဆိုသည်။

“ ပြန်လည်နေရာချထားရေးကိစ္စကို အဓိကထားပြီး ဆွေးနွေးခဲ့ကြပါတယ်။ ဘာကြောင့်လဲဆိုတော့ ကမ့်နဲ့ နေတာကလည်း ကြာပြီလေ။ ဒီစခန်းတွေကို ပိတ်သိမ်းမယ်။ ပြီးရင် အဲဒီအနီးအနားမှာ နေရာချမယ်ပေါ့။” ဟု ဆွေးနွေးပွဲကို တက်ရောက်ခဲ့သည့် သက်ကေပြင် ဒုက္ခသည်စခန်း ကမ့်ကော်မတီအဖွဲ့ဝင် ကိုသန်းရွှေက ပြောသည်။

အစိုးရအနေဖြင့် ရခိုင်ပြည်နယ်ရှိ ဒုက္ခသည်စခန်းများကို ပိတ်သိမ်းနိုင်ရေးအတွက် ၂၀၁၇ ခုနှစ် ဧပြီလကတည်းက အကောင် အထည်ဖော်နိုင်ရေး အစီစဉ်များကို ရေးဆွဲလာခြင်းဖြစ်သလို သတင်းမီဒီယာများသို့ အသိပေး ပြောကြားထားသော်လည်း ယနေ့အချိန်ထိ စတင်နိုင်ခြင်း မရှိသေးခြင်းလည်း ဖြစ်သည်။

စခန်းများပိတ်သိမ်းရေးကိစ္စကို လုပ်ဆောင်ရမည်မှာ မှန်သော်လည်း ပြန်လည်နေရာချထားရေးမှာ ယခင် နေထိုင်ခဲ့သည့် နေရာများတွင် ချပေးမည် မဟုတ်ဘဲ လက်ရှိ ဒုက္ခသည်စခန်းများအနီးတွင်သာ ပြုလုပ်နိုင်မည်ဖြစ်သည်ဟု ဆွေးနွေးခဲ့ကြကြောင်း ကိုသန်းရွှေက ပြောသည်။

ယနေ့ ဇန်နဝါရီ ၃ ရက်နေ့ ရက်စွဲဖြင့် ထုတ်ဝေသည့် နိုင်ငံပိုင် သတင်းစာတွင် ဖော်ပြချက်အရလည်း - ပြည်ထောင်စု ဝန်ကြီး၊ ပြည်နယ်ဝန်ကြီးချုပ်၊ ပြည်နယ်ဝန်ကြီးများ၊ ပြည်နယ်အဆင့်ဌာနဆိုင်ရာများနှင့် IDP စခန်းတွင် နေထိုင်သူများက လက်ရှိ စခန်းကို ပိတ်သိမ်းပြီး သင့်တော်သော ပြန်လည်နေရာချထားရေးနှင့် ပတ်သက်၍ ညှိနှိုင်းဆွေးနွေး သဘောတူညီချက်များ ရယူခဲ့ပြီး အသေးစိတ် အချက်အလက်အား ဆက်လက် ဆွေးနွေးမည် ဖြစ်ကြောင်း ဆုံးဖြတ်ခဲ့ကြသည် ဟု သိရသည်။

အဆိုပါကိစ္စနှင့်ပတ်သက်၍ ရခိုင်ပြည်နယ်အစိုးရအဖွဲ့၏ ပြောရေးဆိုခွင့်ရှိသူ စည်ပင်ဝန်ကြီး ဦးမင်းအောင် (ပြည်နယ်လွှတ်တော်မှ ဇန်နဝါရီ ၂ ရက်နေ့က ရာထူးမှ ရပ်စဲသည်ဟု ဆုံးဖြတ်ခြင်းကို ခံထားရပြီး၊ နိုင်ငံတော်သမ္မတ၏ အတည်ပြုမှုကို စောင့်ဆိုင်းနေသော) ကို ဆက်သွယ်မေးမြန်းခဲ့ရာတွင် “အဲဒီနေ့က အစည်းအဝေးကို ကျွန်တော် မတက်ခဲ့ပါ။ ရန်ကုန်ကိုရောက်နေလို့။ အသေးစိတ်ကို မသိတော့ ဘာမှ ဖြေလို့မရဘူး” ဟု ဖြေကြားခဲ့သည်။

စခန်းတွင် နေထိုင်သူများကမူ ယခု စခန်းများကို ပိတ်သိမ်းမည့်ကိစ္စနှင့် ပတ်သက်၍ စိုးရိမ်မှုများ ရှိနေကြသည်။

“ကျွန်တော်တို့မှာ ဘာစီးပွားရေးမှ မရှိဘူး။ ဒဗလျူအက်ဖ်ပီက ထောက်ပံ့တဲ့ ရိက္ခာနဲ့ စားနေရတာ။ ကမ့်ကိုပိတ်လိုက်ရင် ရိက္ခာက မရတော့ဘူး။” ဟု ဘောဒူဖ ဒုက္ခသည်စခန်းမှ မောင်လှမြင့်က ပြောသည်။

ရခိုင်ပြည်နယ်တွင် ၂၀၁၂ ခုနှစ်က ဖြစ်ပေါ်ခဲ့သော ပဋိပက္ခများကြောင့် ဒုက္ခသည်စခန်းပေါင်း ၃၆ ခု ရှိလာခဲ့ပြီး စစ်တွေမြို့တွင် ၁၅ ခု၊ ရသေ့တောင်မြို့နယ်တွင် ၃ ခု၊ မောင်တောမြို့နယ်တွင် ၈ ခု၊ ကျောက်တော်တွင် ၁ ခု၊ ပေါက်တောမြို့နယ်တွင် ၄ ခု၊ မြေပုံမြို့နယ်တွင် ၁ ခု၊ ကျောက်ဖြူမြို့နယ်တွင် ၂ ခုနှင့် ရမ်းဗြဲမြို့နယ်တွင် ၂ ခု တို့ ဖြစ်သည်။

အဆိုပါ ဒုက္ခသည်စခန်းများရှိ ဒုက္ခသည်များကို ကမ္ဘာ့စားနပ်ရိက္ခာအစီစဉ်မှ လူတစ်ဦးလျှင် တစ်လအတွက် ရိက္ခာ ဆန် ၄၂ ဘူး၊ ဆီ ၁ လီတာ၊ ဆား၊ ပဲနှင့် အခြေခံမီးဖိုချောင်ပစ္စည်းများနှင့် ဆေးဝါးများကို ထောက်ပံ့ပေးနေသလို အခြား နိုင်ငံတကာအကူအညီပေးရေး အဖွဲ့အစည်းများမှလည်း သက်မွေးဝမ်းကြောင်းပညာရပ်များအပါအဝင် ကျန်းမာရေး ကုသစောင့်ရှောက်မှုများကိုလည်း ဆောင်ရွက်ပေးလျက်ရှိနေသည်။
--------------------------------------------------------------------------------------------------------------------------------------

သက်ကယ်ပြင်ဒုက္ခသည်စခန်းကို ပိတ်သိမ်းဖို့ စီစဉ်

3 January 2018       RFA Burmese

ရခိုင်ပြည်နယ်၊ စစ်တွေမြို့က မွတ်စလင်ဒုက္ခသည်စခန်းကို တွေ့ရစဉ်။ Photo: Min Thein Aung/ RFA

ရခိုင်ပြည်နယ်၊ စစ်တွေမြို့က သက်ကယ်ပြင်ဒုက္ခသည်စခန်းကို ပိတ်သိမ်းပြီး သင့်တော်တဲ့နေရာမှာ ပြန်လည်နေရာချထားပေးဖို့ စီစဉ်နေတယ်လို့ ရခိုင်ပြည်နယ်ဆိုင်ရာ အကြံပြုချက်များအပေါ် အကောင် အထည်ဖော်ရေးဆိုင်ရာ ကော်မတီ ဥက္ကဌ ပြည်ထောင်စုဝန်ကြီး ဒေါက်တာဝင်းမြတ်အေး က ဒီနေ့ ပြောပါတယ်။

အဲဒီကိစ္စနဲ့ ပတ်သက်ပြီး ပြီးခဲ့တဲ့ရက်ပိုင်းက စစ်တွေမြို့ကိုသွားရောက်ပြီး ပြည်နယ်အစိုးရအဖွဲ့၊ သက်ကယ်ပြင်စခန်း တာဝန်ရှိသူတွေနဲ့ တွေ့ဆုံဆွေးနွေး ခဲ့တာဖြစ်တယ်လို့ ဝန်ကြီး ဒေါက်တာဝင်းမြတ်အေး က ပြောပါတယ်။

"ပြည်နယ်အစိုးရရယ်၊ သက်ကယ်ပြင်စခန်းက အုပ်ချုပ်သူတွေနဲ့တွေ့တယ်၊ အဓိက ကတော့ ၂၀၁၂ ခုနှစ်တည်းက Camp အသွင်နဲ့ ဖြစ်နေတဲ့ ကိစ္စတွေ၊ အဲတော့ အဲဟာတွေနဲ့ ပတ်သက်ပြီးတော့ ဒီ Camp တွေကို ရေရှည်ဆိုရင် မကောင်းဘူး၊ ဒါကြောင့်မို့လို့ Camp တွေကို ဖျက်သိမ်းပြီးတော့ ပြန်လည်နေရာချထားပေးရေးနဲ့ ပတ်သက်ပြီးတော့ သူတို့နဲ့ တိုင်ပင်တယ် ဆွေးနွေးတယ်၊ အဲကိစ္စ ဆောင်ရွက်တာ၊ သက်ကယ်ပြင် Campနဲ့ ပတ်သက်ပြီးတော့ ဆောင်ရွက်တယ်"

ဒါ့အပြင် ဥပဒေနဲ့ အညီ လွတ်လပ်စွာသွားလာခွင့်ရဖို့အတွက် NV Card ဆောင်ရွက်ဖို့နဲ့ NV Card ကိုင်ဆောင်ထားသူတွေ ရရှိမယ့် အခွင့်အရေးတွေကိုလည်း ရှင်းပြခဲ့တယ်လို့ ပြောပါတယ်။

အစိုးရရဲ့အစီအစဉ်ကို သဘောကျတဲ့သူတွေရှိသလို သဘောမကျတဲ့သူတွေလည်းရှိတယ်လို့ သက်ကယ်ပြင်ဒုက္ခသည်စခန်းခေါင်းဆောင် ဦးရွှေမောင် က ပြောပါတယ်။

" အစိုးရကနေ ကျနော်တို့ လွတ်လွတ်လပ်လပ်နေလို့ရအောင် ဆောက်ပေးမယ်လို့ပြောတယ်၊ အဲဒါကို လူထုကို ကျနော်တို့ရှင်းပြတယ်၊ တချို့က အဲလိုမျိုး စိတ်ဆန္ဒရှိတဲ့သူတွေလည်း ရှိတယ်၊ တချို့လူတွေက လုံးဝ သဘောမကျတဲ့ပုံစံဖြစ်နေတယ်လေ၊ ခိုင်ခိုင်မာမာ အဆောက်အဦး ဆောက်ပေး မယ်ဆိုရင် ပထမ မီးလောင်တဲ့နေရာဆုံးရှုံးမှာစိုးလို့ သူတို့က အဲလိုမျိုးပြောနေကြတယ်၊ ခိုင်ခိုင်မာမာဆောက်ပြီးသွားရင် ရွာပုံစံမျိုးဖြစ်သွားမယ်၊ တဖြည်းဖြည်းနဲ့ ကျနော်တို့ ရိက္ခာကို သိမ်းလိုက်မယ်၊ တစ်ခြား NGO အဖွဲ့တွေ၊ တစ်ခြားအလှူရှင်တွေ ရပ်သွားမှာစိုးလို့၊ WHP ကနေ စားနပ်ရိက္ခာပေးတယ် အဲဒါကိုရပ်သွားမှာ စိုးရိမ်နေကြတယ်"

သက်ကယ်ပြင်ဒုက္ခသည်စခန်းဟာ ၂၀၁၂ ခုနှစ် ပဋိပက္ခတွေကြောင့် ဖြစ်ပေါ်လာတာဖြစ်ပြီး လာမယ့် ဇွန်လဆိုရင် ၆ နှစ်ပြည့်မှာ ဖြစ်ပါတယ်။

အဲဒီစခန်းမှာ အိမ်ထောင်စု ၁ ထောင်ကျော်၊ လူဦးရေ ၆ ထောင်ကျော် ရှိတယ်လို့ သိရပါတယ်။