“မြန်မာလူကုန်ကူးဂိုဏ်းကြီးတစ်ခုကို ထိုင်းနိုင်ငံတွင်နှိမ်နင်း”

                                  

၂၀၁၅ အောက်တိုဘာ ၆

ခွန်တီးခက်လွမ်း.....

 ထိုင်းနိုင်ငံတွင် အကြီးဆုံးမြန်မာလူကုန်ကူးဂိုဏ်းတစ်ဂိုဏ်းအား ထိုင်းအစိုးရလူကုန်ကူးမှုအထူး
စုံစမ်းထောက်လှမ်းရေးတပ်ဖွဲ့အကြီးအကဲ Pol.Lt Col. Komvich ဦးဆောင်သည့်ထိုင်းအာဏာပိုင်များနှင့် မြန်မာသံရုံး အလုပ်သမားကူညီစောင့်ရှောက်ရေးကော်မတီအဖွဲ့ဝင်MATတို့ပူးပေါင်း ၍ စီနင်းဝင်ရောက် နှိမ်နင်းခဲ့သည်။

   ဖမ်းဆီးရမိသည့် ဂိုဏ်းခေါင်းဆောင် ဆိုသူမှာ အသက်လေးဆယ်ကျော်အရွယ် ကိုသိန်းဇော် နှင့်အတူ ဂိုဏ်းသား၂ဦးတို့အား ယမန်နေ့ညဥ့်က ဖမ်းဆီးမိခဲ့ပြီးယနေစီးနင်းမှုတွင် ဂိုဏ်းသား၃ ဦး ကိုဖမ်းဆီမိခဲ့သည်။ တစ်ဦးမှာ ထိုင်းနိုင်ငံသားကဒ်ကိုကိုင်ဆောင်ထားသဖြင့် ပြန်လည်လွှတ်ထားခဲ့သော်လည်း အချက်အလက်များခိုင်မာစွာရှိသဖြင့် တရားရင်ဆိုင်ရမည် ဖြစ်ပါသည်။

ဘုရားသုံးဆူနယ်စပ်မှ ကီလိုမီတာ ၉၀ ခန့်အကွာ ထိုင်းနိုင်ငံအနောက် မြောက်ပိုင်း ကန်ချနဘူရီခရိုင်၊ ထာမကန်မြို့နယ်၊ ဆင်တော်ရပ်ကွက်တွင် နိုင်ငံတကာသို့ တင်ပို့ရောင်းချသည့် အသီးအနှံမျိုးစုံအစားအစာထုတ်လုပ်သည့် (VITA FOOD FACTORY) V&K PINE APPLE CANNI NG Co,Ltd ဟူ၍ရှိပါသည်။

            ထိုအလုပ်ရုံတွင် အလုပ်ရုံတည်ထောင်ကာစကာလများတွင် အလုပ်သမားများအားမည်သို့မည်ပုံ စီမံအုပ်ချုပ်သည်ကို မသိရှိနိုင်သော်လည်း ၂၀၀၃နှစ် လောက်ကတည်းက VITA အလုပ်ရုံ၏ အလုပ်သမားများအပေါ်မတရားနှိပ်ကွပ်မှုများကို ဘန်ကောက်အခြေစိုက် ထိုင်းနိုင်ငံရောက်မြန်မာနိုင်ငံသားများအဖွဲ့ MATက စတင် သိရှိခွင့်ရရှိခဲ့ပါသည်။ ထိုအချိန်ကအဆက်အသွယ်၊ နည်းပညာ၊ အဆက်အသွယ်နှင့် ကိရိယာများ မပြည့်စုံမှု တို့ကြောင့်အချက်အလက်ပြည့်စုံအောင် မစုဆောင်းနိုင်ခဲ့ပါ။

              
သို့ရာတွင်၂၀၁၁ ခုနှစ်ခန့်မှစ၍ စနစ်တကျပိုမိုစုဆောင်းလာနိုင်ခဲ့ပါသည်။ ဤအလုပ်ရုံမှ ထိုင်းအစိုးရ လူကုန်ကူးမှု အထူးစုံစမ်းထောက်လှမ်းရေတပ်ဖွဲ့DSIနှင့်အရေးပေါ်လူကုန်ကူးမှု အနည်းအကျဉ်းတို့ကိုသာကယ် ထုတ်နိုင်ခဲ့ပါသည်။ MAT အဖွဲ့သည် VITA အလုပ်ရုံ၏ မတရားမှုများကို ကုလသမဂ္ဂ လူကုန်ကူးမှုတိုက် ဖျက်ရေးအဖွဲ့ UNIAPနှင့်ပူးပေါင်း၍ World Markတို့ သိရှိအောင် ဆောင်ရွက်နိုင်ခဲ့သော်လည်း လူကုန်ကူးမှုလျှော့နည်းပပျောက်အောင်နှင့် လူကုန်ကူးသည့်ဂိုဏ်းတို့ကိုနှိမ်နင်းနိုင်ခြင်းမရှိခဲ့ပါ။

၂၀၁၃ ခု နှစ်မှာစ၍ ယခုလူကုန်ကူးမှုဂိုဏ်းအား ……DOWN ဟူသည့်အမည်တစ်ခုသတ်မှတ်၍ သတင်းထောက်၉ဦးမြုပ်နှံ၍ အချက်အလက်များကို စုဆောင်းခဲ့ကြပါသည်။ ပြီးခဲ့သည့်နှစ်က အချက်အလက်စုဆောင်းသူတစ်ဦးမှာစိတ်ကြွဆေးပြား၃ပြားထည့်၍ ဖမ်းဆီးထောင်ချခြင်းခံခဲ့ရပါသည်။

    အလုပ်ရုံသည် အလုပ်သမားများကို တိုက်ရိုက်ခန့်ထားခြင်းမရှိပဲ စက်ရုံသို့ အလုပ်သမားများတင်သွင်းခွင့်ရရှိသည့်  ထိုင်းသူဌေး(၃၇)ဦးရှိသည်။ သူဌေးတစ်ဦးလျှင် တရားဝင်အလုပ်သမား၃၈၅ဦးစီ ရှိရမည်ဟုသတ်မှတ်ထားပါသည်။ သို့ဖြစ်၍ VITAစက်ရုံတွင် ၃၇x၃၈၅=၁၄,၂၄၅ ဦး ပုံမှန်ရှိနေရမည်ဖြစ်ပါသည်။ အလုပ်သမားသွင်းရသောသူဌေးတို့၊ အလုပ်သမားများရရှိရေးအတွက်စီစဉ်ထားကြပုံမှာ ဥပဒေနှင့်ညီညွတ်မှု မရှိကြောင်းတွေ့ရှိရမည်ဖြစ်ပါ သည်။ အလုပ်သမားများကို ပေးသွင်းသည့်  သူဌေးများက ….Group အမည်ဖြင့် အလုပ်သမားများအား ငြိမ်ဝပ်ပိပြားအောင် ပိပိရိရိဖြင့်ဖိနှိပ်ထားသည်။ ၎င်းတို့လိုအပ်သော အလုပ်သမားအရေအတွက်နှင့် အလုပ်သမားများအုပ်ချုပ်ရေးကို မြန်မာလူကုန်ကူးဂိုဏ်းများကို လုပ်ကိုင်ခွင့်ပြုထားသည်။

              MAT အဖွဲ့သည် ဓါတ်ပုံနှင့်ဗွီဒီယိုအချက်အလက်အပြည်အစုံတို့ဖြင့် ထိုင်းအစိုးရ လူကုန်ကူးမှုတိုက် ဖျက်ရေးအထူးရဲတပ်ဖွဲ့ AHTD နှင့်ထိုင်းစစ်တပ်တို့သို့ တင်ပြခဲ့သည်။ ၂၀၁၄ ခု ဇွန်လက ပြည်နယ် စစ်ထောက်လှမ်းရေး အကြီးအကဲထံသို့ FED ဒါရိုက်တာ ဦးထူးချစ်နှင့်အတူ အကူညီတောင်းခံခဲ့သော်လည်း အရာမထင်ခဲ့ပေ။ ထို့အပြင် ထိုင်းနှင့်မြန်မာ၂နှစ်နိုင်ငံအစိုးရလူကုန်ကူးမှုတိုက်ဖျက်ရေး တပ်ဖွဲ့များအစည်းဝေး(မန္တလေး)တွင် တိုင်ကြားခဲ့သော်လည်း ဖမ်းဆီး
အရေးယူနိုင်ခြင်းမရှိနိုင်ခဲ့သေးချေ။ 

           

 ယခုဂိုဏ်းအား အချက်အလက်စုဆောင်းနေကြောင်း သတင်းပေါက်ကြားမှုကြောင့် သတင်းထောက်ချုပ် ကိုစောခွန်နောင်ဦး နှင့် ထိုင်းနိုင်ငံရောက်မြန်မာနိုင်ငံသားများအဖွဲ့MAT အဖွဲ့ ဒါရိုက်တာ ဦးကျော်သောင်း တို့၏ ဦးခေါင်းအား ဖြတ်တောက်နိုင်ပါက ဘတ်ငွေ နှစ်သန်းစီချီးမြှင့်မည်ဖြစ်ကြောင်း၎င်းဂိုဏ်းက ကြေညာထားသည်ဟုကိုစောခွန်နောင်ဦး ကပြောသည်။

         သူက “ကျနော် အဲဒီနယ်မှာ အလုပ်လုပ်ရင်း ခရစ်ယာန် ဓမ္မဆရာလုပ်ပါတယ်။ ကျနော့် ခေါင်းကိုဘတ်၂သန်း ကျနော်တို့ ဒါရိုက်တာခေါင်းကိုဘတ်၂နှစ်သန်း ဆိုပြီး သိန်းဇော် တို့ဂိုဏ်းကကြေညာပါတယ်။ ခုကျနော် အဲဒီနေရာမှာနေလို့ မလုံခြုံတော့တာကြောင့် ဘန်ကောက်  MAT ရုံးကိုလာနေတာ ၄လရှိပါပြီ။ ကျနော့်တပည့် တစ်ယောက် ထောင်ကျခံနေရပါတယ်။ ကျနော်တို့ ဘ၀နဲ့ ရင်းပြီး စွန့်စားခဲ့ရတယ်လို့ဆိုရင် အပိုပြောသလိုဖြစ်နေမလား။ သိန်းဇော်တို့ဂိုဏ်းက လူတစ်ယောက်ကို ၀ိုင်းရိုက်သတ်နေတာကို ထိုင်းရော ဗမာရော ရပ်ပြီးတောင် မကြည့်ရဲပါဘူး။ လူတစ်ယောက်အသက်ဆိုတာ၊ သူ့ပါးစပ်က ရှင်းလိုက် တစ်လုံးပဲလိုတယ်၊ တကယ့် မာဖီးယား 
ဂိုဏ်းကြီးပါ” ဟုပြောသည်။

       

   ဤအလုပ်ရုံအား မြန်မာသံရုံးအလုပ်သမားသံအရာရှိတို့ကိုယ်တိုင်သွားရောက်၍ MOU ဖြင့် အလုပ်သမားတင်သွင်းရန် ပြောဆိုစည်းရုံးနိုင်ခဲ့သဖြင့် ၄နှစ်ခန့်အတွင်း ထောင်ပေါင်းများစွာသော အလုပ်သမားများတင်ပို့ခဲ့သော်လည်း လုပ်အားအဓမ္မအကျိုးစီးပွားဖြင့် အကျင့်ပါနေသော ပွဲစားဂိုဏ်းများများ၏ အမူအကျင့်မှာ ပြောင်းလဲလာခြင်းမရှိခဲ့ပါ။

           MAT အဖွဲ့ ဒါရိုက်တာ ဦးကျော်သောင်း က“ ထိုင်းနိုင်ငံမှာ မြန်မာလူကုန်ကူးဂိုဏ်းတစ်ဂိုဏ်းကိုနှိမ်နင်းဖို့ခက်ခဲပါတယ်။ လူကုန်ကူးတယ်ဆိုတာ အာဏာပိုင်နဲ့ငွေကြေးချမ်းသာသူတို့ လုပ်ကြတဲ့အလုပ်ပါ။ ထိုင်းနိုင်ငံမှာ လူကုန်းမှုလုပ်နေတဲ့ ကျနော်တို့အဖွဲ့ဟာ ဆယ်စုနဲ့ချီပြီး ထိုင်းအစိုးရလူကုန်ကူးမှုတိုက်ဖျက်ရေးတပ်ဖွဲ့တွေနဲ့ လက်တွဲလုပ် လာခဲ့တဲ့ယုံကြည်မှုကအဓိကပါ။ လူကုန်ကူးဂိုဏ်းတွေကို နှိမ်နင်းတဲ့အခါ ကျနော်တို့အတွက် အခက်အခဲ သိပ် မရှိပေမယ့် ခိုင်မာတဲ့အထောက်အထားတွေရအောင်စုဆောင်းရတာက ကျနော်တို့ အဖွဲ့ဝင်တွေ စွန့်စားရပါ တယ်။ အန္တရာယ်အလွန်များပြီး အချိန်နဲ့ငွေနဲ့ ကုန်ကျပါတယ်။ ကျနော်တို့တစ်ဖွဲ့လုံး ဘယ်ကမှလစာရသူတွေ မဟုတ်ပါဘူး။ မိမိအလုပ် ကိုယ်စီနဲ့ မိမိငွေအကုန်အကျခံပြီးလုပ်နေကြတာပါ။ တစ်ခါ တစ်လေ အလှူရှင် တစ်ချို့က စရိတ်စက ကူညီပေးတာမျိုးတော့ရှိပါတယ်။ ဒီနှစ်မကုန်မီ ထိုင်းမှာ အဓိက လူကုန်ကူးဂိုဏ်းကြီး တွေကိုနှိမ်နင်းနိုင်အောင် ပြင်ဆင်ထားကြပါတယ်” ဟုပြောသည်။ 

          မြန်မာသံရုံးအလုပ်သမားကူညီစောင့်ရှောက်ရေးကော်မတီနှင့်အတူ MAT အဖွဲ့သည် ၂၀၁၃ ခုနှစ်က  သြဂုတ်လ ၁ရက်နေ့က မလေးရှားနယ်စပ်အနီး ကတန်မြို့မှ မြန်မာလူကုန်ကူးဂိုဏ်းကြီး၏ ဂိုဏ်းခေါင်းဆောင်အားAHTDက သေနတ်ဖြင့်တင်ပါးကိုပစ်ဖမ်း၍ ဂိုဏ်းသား ၅ဦးကို ဖမ်းဆီးနှိမ်နင်းနိုင်ခဲ့သည်။ အဆိုပါဂိုဏ်း၏ လူသတ်မှု ရက်စက်မှုများအား အင်္ဂလန်နိုင်ငံမှ  Environmental Justice Foundation (EJF) က VDO သတင်းနှင့် အစီရင်ခံစာတစ်ခုကို
ကမ္ဘာသို့ထုတ်ပြန်ခဲ့သည်။

   MAT အဖွဲ့သည် ၂၀၁၁ ခုနှစ်တွင်လူကုန်ကူးခံရသူပေါင်း ၅၀ဦး၊ ၂၀၁၂ ခုနှစ်တွင် ၂၉၂ဦး၊၂၀၁၃ ခုနှစ်တွင် ၂၆၄ဦး၊ ၂၀၁၄ ခုနှစ်တွင် ၁၂၀ဦးနှင့် ၂၀၁၅ခုနှစ်တွင် အကြိမ်၂၁ ကယ်တင်မှုတွင် ၇လအတွင်း ၁၅၉ ဦးတို့အား ကယ်ထုတ်နိုင်ခဲ့ပြီးဖြစ်ပါသည်။

     လူကုန်ကူးသူပေါင်း ၁၀ ဦးကိုဖမ်းဆီး တရားစွဲဆိုနိုင်ခဲ့ပြီဖြစ်ပါသည်။
(စာရင်းကို ပြန်လည်ဖြည့်စွက်ပြင်ဆင်ထားပါသည်။)