မွန်လူငယ်နေ့ မွန်ပါတီတွေကို မဖိတ်

23 December 2017            RFA Burmese

မွန်ပြည်နယ် မုဒုံမြို့နယ် နှီးပတောကျေးရွာမှာ မွန်လူငယ်နေ့ တတိယအကြိမ်မြောက် အခမ်းအနားကို ၂ဝ၁၄ ခုနှစ် ဒီဇင်ဘာလ ၂၈ ရက်နေ့က ကျင်းပခဲ့စဉ်။ Photo: Kyaw Lwin Oo/RFA

မွန်ပြည်နယ် ချောင်းဆုံမြို့နယ် ကမာမိုကျေးရွာမှာ ကျင်းပပြုလုပ်မယ့် ဆဌမအကြိမ်မြောက် မွန်လူငယ်နေ့ အခမ်းအနားကို မွန်နိုင်ငံရေးပါတီတွေကို ဖိတ်ကြားမှာမဟုတ်ဘူးလို့ ပွဲကျင်းပရေး ကော်မတီအဖွဲ့ဝင်တွေက ဒီနေ့ ပြောပါတယ်။

မွန်ပြည်သူတွေလိုချင်တဲ့ နှစ်ပါတီပေါင်းစည်းရေးကို ပါတီတွေက လိုလိုလားလား မဆောင်ရွက်တာကြောင့် မွန် လူငယ်နေ့မှာ မဖိတ်ကြားဘူးလို့ ပွဲကျင်းပရေးကော်မတီဝင် ကိုဥာဏ်စိုက်ရာမာရ်က ပြောပါတယ်။

မွန်လူငယ်နေ့ အခမ်းအနားကို လာမယ့် ဒီဇင်ဘာလ ၂၈ ရက်နေ့မှာ ကျင်းပမှာဖြစ်ပါတယ်။

မွန်နှစ်ပါတီ ပေါင်းစည်းရေးကြိုးစားနေတဲ့ မွန်ပါတီပေါင်းစည်းရေးအဖွဲ့ကို မွန်လူငယ်တွေက ထောက်ခံခဲ့ပြီး ပေါင်းစည်းရေးမလုပ်နိုင်သရွေ့ မွန်နိုင်ငံရေးပါတီတွေကို အသိအမှတ်မပြုဘူးလို့လည်း ကော်မတီဝင်တွေက ပြောပါတယ်။

မွန်လူငယ်နေ့ အခမ်းအနားကို မွန်လူမျိုးတွေရှိတဲ့ မွန်ပြည်နယ် ၁၀ မြို့နယ်အပါအဝင် ကရင်ပြည်နယ်၊ တနင်္သာ ရီတိုင်း၊ ရန်ကုန်တိုင်းနဲ့ ပဲခူးတိုင်းမှာရှိတဲ့ မွန်လူငယ်တွေကို ဖိတ်ကြားထားတဲ့အပြင် ပလောင်၊ ပအိုဝ်း၊ ကရင် စတဲ့ တိုင်းရင်းသားလူငယ်တွေကိုလည်း ဖိတ်ကြားထားတယ်လို့ သိရပါတယ်။

ဒီဇင်ဘာလ ၂၈ ရက်နေ့တိုင်းကို မွန်လူငယ်နေ့အဖြစ် သတ်မှတ်ကာ အခမ်းအနားတွေ ကျင်းပလာတာ အခုဆိုရင် ၆ ကြိမ်မြောက်ရှိနေပြီဖြစ်ပြီး ကရင်ပြည်နယ် ကြာအင်းဆိပ်ကြီးမြို့နယ်၊ ကော့ကရိတ်မြို့နယ်၊ မွန်ပြည်နယ် ရေးမြို့နယ်၊ မုဒုံမြို့နယ်နဲ့ သံဖြူဇရပ်မြို့နယ်တို့မှာ ကျင်းပပြုလုပ်ခဲ့ပြီးဖြစ်ပါတယ်။